लिपुलेक, लिम्पियाधुरा र कालापानीको नयाँ विवादबारे कसले के भने ?

२० कात्तिक, काठमाडाैँ । भारतले नेपालको झण्डै ३ सय ७२ वर्ग किलोमिटरभन्दा धेरै जमिन आफ्नो भन्दै नयाँ राजनीतिक नक्सा सार्वजनिक गरेपछि नेपालमा त्यसको चर्को बिरोध सुरू भएको छ । भारतले सार्वजनिक गरेको नक्साअनुसार कालापानी क्षेत्रको मात्रै ६२ वर्ग किलोमिटर क्षेत्र परेको छ । यस्तै लिपुलेकबाट आएको नदीदेखि लिम्पियाधुरातर्फबाट आएको नदी क्षेत्रको झण्डै ३१० वर्ग किलोमिटर क्षेत्र मि नक्साभित्र समेटेको छ । सामाजिक सञ्जालदेखि सडकसम्म भारतविरोधी नारा गुञ्जिएका छन भने गो ब्यक इन्डिया भन्ने ह्यसट्याग समेत चलेको छ ।

भारतले दार्चुला जिल्लाको लिपुलेक, लिम्पियाधुरा र कालापानी क्षेत्रलाई गएको शनिबार सार्वजनिक गरेको राजनीतिक नक्सामा समेटेको छ । यसअघि पनि यो क्षेत्र आफ्नो भन्दै भारतले दाबी गर्दै आएको थियो । जम्मू–कश्मीर औपचारिक रूपमा दुईवटा केन्द्रशासित राज्यमा विभाजित भएसँगै नरेन्द्र मोदी नेतृत्वको सरकारले भारतको नयाँ नक्सा सार्वजनिक गर्ने क्रममा नेपालको लिपुलेक, लिम्पियाधुरा र कालापानी क्षेत्रलाई आफ्नो नक्सामा समावेश गरेको हो । यही विषयमा केन्द्रीत रहेर धेरैले धेरैथरी विश्लेषण गरेका छन भने भारतीय हेपाव प्रवृितको खुलेर बिरोध गरेका छन ।