भारतमा आलोपालोको ललिपप खाएका प्रचण्डको कांग्रेसको निर्णयले निदहराम

९ साउन, काठमाडाैँ । निर्वाचनको मिति तोक्न ढिलाइ भइरहँदा सत्तारुढ दलहरुले एक अर्कालाई ‘साइज’ मा ल्याउने प्रयत्न गरिरहेका छन् । नेपाली कांग्रेसले केन्द्रीय समिति बैठकबाट आगामी पाँच वर्ष आफ्नो नेतृत्वमा गठबन्धनका दलहरुको साथमा सरकार बनाउने निर्णय गरेसँगै सत्ता गठबन्धनका अन्य दलहरु झस्किएका छन् र उनीहरुले पनि आफूहरुलाई ‘सम्मानजनक’ सीट नदिए छुट्टै मोर्चाबन्दी गर्ने चेतावनी मात्र दिएका छैनन् त्यसका लागि कसरत गरेको देखाइरहेका छन् ।

गत स्थानीय तहको निर्वाचनको मत परिणाममा सन्तोष व्यक्त गरेको कांग्रेसले केन्द्रीय समिति बैठकले गरेको निर्णयमा भनिएको छ- बैशाख ३० मा सम्पन्न स्थानीय निर्वाचनबाट पहिलो दल बनेको नेपाली कांग्रेसलाई आसन्न प्रतिनिधिसभा तथा प्रदेशसभाको निर्वाचनबाट स्पष्ट बहुमततर्फ लक्षित गराउँदै संविधानको रक्षा र लोकतन्त्रको थप सुदृढीकरण गर्दै जनताको समुन्नतिको सपनालाई स्थिर सरकारमार्फत सम्वोधन गर्नका लागि केन्द्रीय कार्यसमितिको यो बैठक सत्ता गठबन्धनमा रहेका दलहरुसँग सम्वाद गरी चुनावी तालमेल गरेर अघि बढ्ने निर्णय गर्दछ ।

त्यस्तै अर्को निर्णयमा भनिएको छ- यसरी गठबन्धनमा रहेका दलहरुका बीचमा तालमेल गर्दा संविधानको कार्यान्वयन, आर्थिक–सामाजिक रुपान्तरण र वैदेशिक सम्बन्ध लगायतका विषयमा न्यूनतम साझा धारणा निर्माण गर्दै आम नेपाली जनतालाई पाँचवर्ष स्थिर सरकारमार्फत जनताको जीवनस्तरमा गुणात्मक सुधार ल्याउने स्पष्ट कार्यक्रमको खाकासहित आम निर्वाचनमा नेपाली कांग्रेस प्रस्तुत हुनुपर्दछ भन्ने ठहर यो बैठक गर्दछ ।

त्यसमाथि कांग्रेसको बैठकमा गृहमन्त्रीमार्फत एक्ला एक्लै लड्दा नेकपा माओवादी र समाजवादीको अत्यन्तै न्यून स्थानमा सीट आकलन गरिएको सरकारी रिपोर्ट पेस गरिएको नेताहरुले बताएका छन् । एकीकृत समाजवादीले १ र माओवादी केन्द्रले ७ वा ८ स्थानमा मात्र जित निकाल्न सक्ने भन्दै डाटा प्रस्तुत गरेर कांग्रसले ती दलहरुलाई कमजोर देखाइदिएको छ ।

जसमा एकीकृत समाजवादीका अध्यक्ष माधव कुमार नेपालले असन्तुष्टि नै जनाएका छन् । सरकारी डाटा भन्दै समाचारहरु सार्वजनिक भएपछि एक कार्यक्रममा नेपालले सीट संख्यालाई अत्यन्त कम देखाएर आफूहरुको मानमर्दन गर्न खोजेको बताएका छन् ।

कांग्रेसले सहयात्री दलहरुलाई कस्दै आफूलाई बलियो शक्तिको रुपमा देखाउने प्रयत्न गरिरहँदा माओवादी केन्द्र, एकीकृत समाजवादी, जनता समाजवादी पार्टी लगायतले सत्ता गठबन्धनभित्रको अर्को गठबन्धनको तयारी गरेको सन्देश कांग्रेसलाई दिएका छन् ।

नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले वामपन्थी एकता वा समाजवादी केन्द्र बनाउने विषयमा छलफल भइरहको बताएका छन् । त्यसका लागि तत्कालीन नेकपाका बहुमत सचिवालय सदस्यहरुबीच केही चरणमा छलफल भइरहेको छ । तर यसबारे औपचारिक टुंगो लाग्न बाँकी रहेको नेताहरुको भनाइ छ ।

‘बाबुरामजी, माधवजी र उपेन्द्र यादवसँग वामपन्थी एकता वा समाजवादी केन्द्र वा चुनावी मोर्चा बनाउने विषयमा छलफल भइरहेको छ’ शनिबार जनकपुर पुगेका प्रचण्डले भनेका थिए, ‘त्यसमा वामदेवजी पनि मिसिनुभएको छ। औपचारिक रुपमा कुनै टुंगोमा पुगेको छैन ।’

त्यस्तो वामपन्थी गठबन्धन र मोर्चाबन्दी गरेर कांग्रेसलाई मात्र होइन नेकपा एमालेलाई पनि ‘धक्का’ दिने पक्षमा प्रचण्ड र माधव नेपाल रहेका छन् । तर नेकपा एमालेका अध्यक्ष केपी शर्मा ओलीले भने फेरि अर्को फुटका लागि एकता अभियान सुरु भएको बताएका छन् । ‘…एकता अभियान । यो फेरि अर्को फुटका लागि एकता अभियान सुरु भएको छ । यो त्यति सफल हुँदैन,’ ओलीले भनेका थिए ।

चुनावसम्ममा सत्ता गठबन्धन टुट्ने उनको दाबी छ । ‘सबैले भन्छन्, यो गठबन्धन तोडौं । तर मैले भने होइन, यो गठबन्धन आफैं टुट्छ । किनभने यो स्वार्थका लागि बनेको गठबन्धन हो । यो समयक्रममा आफैं टुट्छ,’ उनले भने ।

तर सत्ता गठबन्धनका दलहरु भने चुनावसम्म मात्र होइन सत्ता गठबन्धन पाँच वर्ष कायम रहने दाबी गर्छन् । गठबन्धन भए पनि कांग्रेसले आफूहरुलाई प्रयोग गर्न खोजेको एकीकृत समाजवादीका अध्यक्ष नेपालको तर्क छ । ओलीकै कारण कांग्रेससँग गठबन्धनमा जानुपर्ने बाध्यता आइपरेको भए पनि अहिले कांग्रेसमा पनि ओलीको जस्तै अहंकार बढ्दै गएकाले सडकमा पुग्ने अवस्था नल्याउन कांग्रेसलाई उनले अनुरोध गरेका छन् ।

उनले आफ्नो दल अब पूर्ण रुपमा गठबन्धनको भर नपर्ने दाबी गरेका छन् र कांग्रेसलाई एक्लै भए पनि चुनावमा जाने चुनौती पेस गरेका छन् । अध्यक्ष नेपालले अब भने गठबन्धनको डम्फूमात्रै बजाएर बस्न नसकिने बताउँदै आफ्नै बलमा निर्वाचन लड्ने चेतावनी दिइरहेका छन् । उता माओवादी केन्द्रमा पनि कांग्रेसले गठबन्धनको नाममा आफूहरुलाई पेलिरहेको नेताहरुले बताइरहेका छन् । माओवादी केन्द्रका नेता नारायणकाजी श्रेष्ठले गठबन्धनको नाममा कांग्रेसको निरन्तरको बलजफ्ती स्वीकार्य हुन नसक्ने चेतावनी दिएका छन् ।

भारतीय ललिपपमा धक्का

केहीदिन अघि प्रधानमन्त्री एवं कांग्रेस सभापति शेरबहादुर देउवाकी पत्नी डा आरजु राणा देउवाको सम्पूर्ण योजनामा भाजपाको निमन्त्रणमा भारत जान पाएका प्रचण्डले त्यहाँ आलोपालो प्रधानमन्त्री हुनेमा ढुक्क हुनु कांग्रेसले भनेको सबै मान्नु भनेर पठाए । प्रचण्ड सोही अनुसार भरतीय प्रधानमन्त्री मोदीलाई भेटन नपाउँदा पनि आफ्नो भ्रमण सफल भएको र अहिलेसम्मकै राम्रो भारत भम्रण भएको भन्दै प्रचण्डले विमानस्थलमा पत्रकारका अघि नै भने ।

तर प्रचण्ड भारतबाट फर्केको केहीदिनमै कांग्रेसले आफ्नो नेतृत्वमा पाँच वर्ष सरकार बनाउनेगरी अघि बढ्ने निर्णय गर्यो । त्यसपछि प्रचण्डको निन्द्रा हराएको छ । भारत गएर गरेको सहमति अनुसार प्रचण्डले नागरिकता विधेयक रातारात पास गर्न देउवालाई सहयोग गरे । बैबाहिक अंगिकृत सम्बन्धी नागरिकताको प्रावधान भारतीय इच्छामा तयार भएको थियो । जुन हुबहु पास पनि भयो ।

तर प्रचण्ड कांग्रेसको निर्णयले दिएको तनाव भुलाउनका लागि बामगठबन्धन र एकताको कुरा गरेर कांग्रेसलाई तर्साउन खोजिरहेका छन । कांग्रेसले एकल बहुमतका लागि तयारी गरिरहेका कारण प्रचण्डको सबै सपना चुनावबाट चकनाचुर हुन सक्ने अनुमान राजनीतिक विश्लेषकहरूले गर्न थालेका छन । यद्यपी प्रचण्डका पछिल्लो प्रयास के हुन्छन त्यो हेर्न लायक हुनेछ ।