बैतडीको उदयदेव र फाल्ङाशैनी भगवतीमा बलिसहित जात्रा
२८ असोज , बैतडी । बैतडीको पाटनस्थित उदयदेव मन्दिरमा भव्य जात्रा लागेको छ । रांगा बोकाको बलिसहित लाग्ने जात्रामा बिहीबार ३६ रांगाको बलि दिइएको छ । बिहीबार महानवमीका दिन कैलपाल मन्दिर र उदयदेव मन्दिरमा पूजाआजा गरिसकेपछी कालिकामा बलि दिने चलन छ ।
पाटनस्थित मैतोडामा बिहीबार भव्य रूपले डेउडासमेत लाग्ने गरेको छ । बैतडीसहित छिमेकी जिल्लाका डेउडिया कलाकारहरू पाटनमा डेउडा खेल्न आउने गरेका छन् ।
पाटनस्थित उदयदेव मन्दिरमा बिहीबार लाग्ने जात्रामा भारतमा दर्शनार्थीहरूसमेत आउने गरेका छन् । पाटन मध्यपहाडी लोकमार्गको नमुना सहर भएकाले उदयदेव जात्रामा दर्शनार्थीहरूको घुइँचो लाग्ने गरेको छ ।
यसैगरी, जिल्लाको सुर्नया गाउँपालिका-५ को फाल्ङाशैनी भगवती मन्दिरमा भव्य जात्रा लागेको छ । उक्त मन्दिरमा रातिको समयमा रांगा बोकाको बलि दिइने गरेको छ ।
प्रकाशित मिति : २८ आश्विन २०७८, बिहीबार १७:१७
