Logo

कांग्रेस नेता गगन थापाले जनतालाई ६ करोडको खसी बाख्रा देखाउनु पर्दैन ?



-ऐन महर

मुलुकलाइ माया गर्ने, यो मुलुक थितिले चलोस भन्ने ठान्ने जोकोही नागरिकले भ्रष्टाचारको बिरोध गर्नु पर्छ, भ्रष्टाचारीलाइ घृणा गर्नु पर्छ । भ्रष्टाचार गर्नेको अनुहार कस्तो छ भनेर छुट्याइ छुट्याइ बहस गर्ने हो भने त्यस्तो नागरिक, नेता, कार्यकर्ता आफै भ्रष्टाचारको मतियार हो, केवल आफुले वा आफुले रुचाएकाले मात्र भ्रष्टाचार गर्ने हैसियत राख्छ अरुले राख्दैन भन्ने हो ।

यतिबेला संसदमा भ्रष्टाचार सम्बन्धको अडियो कान्ड चर्चामा छ । ओली सरकारकै पालामा अनियमिततामा मुछिएका, नैतिकतामा प्रश्न उठाइएका पुर्व उपप्रम, पुर्व मन्त्री, सभामुख, न्यायाधिस, प्रदेशमन्त्री, बहालवाला सांसद, पुर्व अख्तियार प्रमुख, अख्तियार आयुक्त, अर्बौ भ्याट र कर छलेका ठुला ब्यापारी र उध्योगपति, सदियौदेखी सुन तस्करी गर्ने माफियाहरु (एकजना नेका नेता समेत) लाइ कारबाही गरिएका छन, मुद्दा चलाइएको छ। कोही जेलमा छन । यी मध्य कोही आफ्नै पार्टीका नेता वा समर्थक पनि छन, कोही अन्य पनि छन । देखिएका र भेटिएकालाइ राटो नछोडी कारबाही प्रकृया अघि बढाइएका छन ।

यति बेला कांग्रेस संसदमा अडियो कान्डको खुब मच्चि मच्चि बिरोध गरिरहेको छ । कांग्रेस यसरी भ्रष्टाचारको बिरोधमा खडा हुँदा बिछट्टै खुसी लागेको छ, तर अचम्म पनि लागेको छ । कांग्रेसका नेता जयप्रसाद गुप्ता, चिरिन्जीवी वाग्ले, खुम बहादुर खड्का, गोविन्दराज जोशी, बिजय गछ्छदारहरु भ्रष्टाचारमा मुछिदा कांग्रेस बैठक बसेर औपचारीक रुपमा बचाउमा निर्णय गर्छ । भातृसंगठनहरुलाइ सडकमा प्रतिबाद गर्न उतार्छ । जेलबाट छुटेका खुमबहादुरलाइ ११० किलोको माला उनेर स्वागत गर्न पुग्छ । बिरामी हुँदा राज्यकोषबाट ३५ लाख सहयोग दिन्छ । कांग्रेस बडो बिचित्रको छ; माछा देखे दुलो भित्र हात, सर्प देखे दुलो बाहिर हात ।

देशमा फट्याङग्रा मर्यो भनेपनि प्रधानमन्त्रीको जवाफ खोज्ने माननिय गगन थापाको कुरो त झन बिचित्र छ । सधै पारदर्शिताको, भ्रष्टाचारको, सुशासनको कुरो उठाउने गगन थापाले सांसद हुँदै लगेको ६ करोडको अनुदानका बिषयमा देशैभरी कुरा उठ्यो । गोकुल बास्कोटाको अडियो कान्ड आएको १८ घन्टा नबित्दै मन्त्रीपदबाट नैतिकताका आधारमा राजिनामा गर्न लगाउने प्रम ओलीको राजीनामा माग्ने गगन थापाले जनतालाइ ६ करोडको खसीबाख्रा देखाउँनु पर्दैन? उनी स्वास्थ्य मन्त्री हुँदा वीर अस्पतालको लागी ६ अर्बमा खरीद गरिएको स्वास्थ्य उपकरणमा २ अर्ब घोटाला भएको भन्ने छ ।

महालेखा परिक्षकले समेत बेरुजु देखाएको छ; जवाफ दिनु पर्दैन माननीय गगन थापा? बिपी कोइराला बिज्ञान प्रतिष्ठानको कुलपति लगायतका पदाधिकारी नियुक्ति गर्दा १० करोड भ्रष्टाचार भएको भन्ने बिषय जताततै छरपष्ट आयो । कुलपति आफै पनि भ्रष्टाचारमा जाकिएका छन, माननीय गगन थापाले जवाफ दिने हिम्मत गर्नु पर्दैन? आफ्ना नेता भ्रष्टाचारमा परे हाम्रा नेता फसाइयो भनेर बिरोधमा संसद चल्न नदिने, अरु नेतामा भ्रष्टाचारको गन्ध आयो भने कारबाहिको प्रकृया अघि बढाउँदा पनि प्रश्न गर्ने, संसद अवरोध गर्ने ।

आफ्ना नेता जेल परे सडकमा ढुङगा हान्न आउने, जेलबाट छुटे ११० किलोको माला बोकेर जेलको गेटमा पुग्ने माननीय गगन थापा ! नेकपा यस्ता दुइ मापदन्ड बोकेर हिड्दैन । भ्रष्टाचारमा निर्मम प्रस्तुत हुन्छ; राटो नबिराइकन । कांग्रेसलाइ पनि भ्रष्टाचार प्रतिरोधमा निरिपेक्ष बनाउँनुस । आफ्नो अनुहारमा पोतिएको कालोलाइ सेतो देख्ने, अरुका अनुहारमा दाग देखे सिंगो जीउ कालो देखें भन्ने चेतले भ्रष्टाचार निर्मुल हुँदैन ।

लेखकः अनेरास्ववियूका संयोजक हुन । 

प्रकाशित मिति : १३ फाल्गुन २०७६, मंगलवार २१:२८
प्रतिक्रिया दिनुहोस्