रौतहट बम काण्डका नाइके आलमलाई नख्खु कारागार ल्याइयो
३० कात्तिक, काठमाडौं । रौतहट बम काण्डका नाइके तथा नेपाली कांग्रेसका नेता मोहम्मद अफताब आलमलाई नख्खु कारागार ल्याइएको छ । रौतहटमा राख्न सुरक्षा जोखिम बढ्ने भन्दै आलमलाई रातारात ललितपुरमा रहेको नख्खु कारागारमा सारिएको हो ।
प्रहरी उच्च स्रोतका अनुसार आलमलाई शनिबार बिहान साढे ४ बजेतिर नख्खु कारागार पुर्याइएको छ । उनलाई शुक्रबार राति नै इलाका प्रहरी कार्यालदय चन्द्रनिगाहपुरको टोलीले कडा सुरक्षाबीच हस्तान्तरण गरेको थियो ।
जिल्ला अदालत रौतहटले आलमलाई थुनामा राख्न शुक्रबार आदेश दिएको थियो । बादीको तर्फबाट १४ वकिलले थुनामा राखि कारबाही माग गर्दै बहस गरेका थिए । प्रतिवादी आलमका तर्फबाट २८ कानुन व्यवसायीले उनको बचाऊको पक्षमा बहस गरेका थिए ।
सर्वस्वसहित जन्मकैद माग गर्दै रौतहट जिल्ला अदालतमा आलमविरुद्ध मुदा दायर भएको छ । सर्वोच्चले २०६९ जेठ १६ गते आलमलाई पक्राउ गरी अनुसन्धान गर्न आदेश दिए पनि उनी बच्दै आएका थिए ।
पछिल्लोपटक पीडितहरुले सर्वोच्चको आदेश कार्यान्वयन नभएको भन्दै गृह मन्त्रालय र नेपाल प्रहरीविरुद्ध अवहेलना मुद्दा दर्ता गरेलगत्तै सर्वोच्चले के कारणले पक्राउ नगरेको भन्दै पत्र लेखेपछि प्रहरीले उनलाई असोज २६ गते पक्राउ गरेको थियो ।
प्रकाशित मिति : ३० कार्तिक २०७६, शनिबार ०९:१५