Logo

सगरमाथामा पनि जाम भनेर दुष्प्रचार गर्ने निर्मल पुर्जाले हिमाल आरोहणमा राखे नयाँ विश्व कीर्तिमान



१२ कात्तिक, काठमाडाैँ । म्याग्दीका निर्मल पुर्जाले आठ हजार मिटरभन्दा अग्ला संसारका १४ हिमाल चढेर विश्व कीर्तिमान कायम गर्नुभएको छ । आज चीनको तिब्वतमा अवस्थित सिसापङ्मा हिमालको चुचुरोमा पुगेसँगै पुर्जा सात महीनामा विश्वका सबै आठ हजार मिटरभन्दा अग्ला हिमाल आरोहण गर्ने पहिलो पर्वतारोही हुन सफल हुनु भएको हो ।

सोमबार उहाँले विश्वकै चौथो अग्लो सिसापङ् (८,०२७ मि) हिमाल आरोहण गर्नुभएको हो । चिनियाँ सरकारले सन् २०१९ सम्मलाई सिसापाङ्मा हिमाल आरोहण रोके पनि विश्व रेकर्डका लागि गरिएको अनुरोधलाई स्वीकार गर्दै विशेष अनुमति दिएको थियो ।

म्याग्दीको अन्नपूर्ण गाउँपालिका–३ दानामा जन्मिनु भएका पुर्जाले गत वैशाख १० गते अन्नपूर्ण गाउँपालिकाकै नारच्याङमा अवस्थित आठ हजार ९१ मिटर अग्लो अन्नपूर्ण हिमालबाट आरोहण शुरू गर्नुभएको थियो । त्यसलगत्तै म्याग्दीमै रहेको सातौँ अग्लो धवलागिरि हिमालको (८,१६७ मि) आरोहण गरेपछि थप हिमाल आरोहणमा निस्कनु भएको उहाँका आफन्त रेमन पुर्जाले जानकारी दिनुभयो ।

पुर्जाले धवलागिरि हिमालमा बिना अक्सिजन आरोहण गर्नुभएको जनाइएको छ । उहाँले विश्वकै अग्लो सगरमाथा, केटु, कञ्चनजङ्गा, ल्होत्से, मकालु, च्होयो, मनास्लु, ना¬ङ्गा पहाड, गशेरब्रुम, ब्रोड पिक, गशेरब्रुम दोस्रोको आरोहण गर्नुभएको हो । आरोहण गरेका १४ अग्ला हिमालमध्ये आठ भने नेपालमै पर्दछन् । त्यस्तै, अरू पाकिस्तान र चीनमा पर्दछन् । हालसम्म विश्वमा कुनै पनि आरोहीले छोटो समयमा दुई दर्जन हिमालको आरोहण गरेको विश्वमा नै रेकर्ड नभएको बताइएको छ ।

मासिक १४ लाखसम्म नेपाली तलब हुने जागिर छोडेर आरोहणमा होमिएका म्याग्दी अन्नपूर्ण गाउँपालिका–४ दानाका पुर्जाको प्रोजेक्ट पोसिबल’ परियोजना नाम दिइएको थियो । आरोहणको क्रममा विभिन्न हिमालमा अलपत्र परेका आरोहीलाई उद्धार गरेर संसारभरि चर्चा कमाउन सफल हुनु भएको छ ।

आरोहणमा पुर्जालाई मिग्मा डेभिड शेर्पा, लाक्पा शेर्पा, तेन्जिङ शेर्पालगायत शेर्पाको टोलीले सघाइरहेको छ । ३५ वर्षीय निर्मल ‘स्पेशल फोर्स’मा छानिने पहिलो गोर्खाली हुनुहुन्थ्यो । मार्च २०१९ मा ब्रिटिस आर्मीको जागिर छाडेर हिमाल आरोहण अभियान थालेका पुर्जाले आफ्नै जन्म जिल्लामा रहेको आठ हजार मिटर अग्लो धवलागिरि र अन्नपूर्ण आरोहण गर्ने पहिलो म्याग्देलीको उपाधिसमेत जित्नुभएको छ ।

पुर्जा ती व्यक्ति हुन जसले गएको वसन्त ऋतुमा सगरमाथा आरोहणका क्रममा हिलारी स्टेप र साउथ कोल क्षेत्र पुगेका आरोहीको तस्बिर  गलत प्रचारसहित बेलायतमा बिक्री गरेका थिए । बेलायत सेनाबाट यसै वर्ष अवकाश लिएका पुर्जाले ३ सय पाउन्ड मूल्यमा सगरमाथाको लामको फोटो धमाधम बेचेका थिए । उनले वेबसाइटमै मूल्य तोकेरे नेपाल र सगरमाथाको गलत प्रचार गर्दै फोटो बिक्री गरेका थिए ।

पुर्जाले चुचुरो पुगेर फर्कने क्रममा उनी अगाडि उभिएर फोटो खिची बेलायतमा फोटो प्रुभ निम्सदाई लेखेर प्रिन्ट गरी बिक्रीवितरण गर्दै आएको थिए । पुर्जाले आफ्नै फेसबुक एकाउन्टबाट ५ सय प्रतिमात्र बाँकी भन्दै खरिद गर्न आह्वानसमेत गरेका थिए । पुर्जाकै गलत प्रचारका कारण सगरमाथामा मे २२ र २३ गते भएको लामलाई लिएर प्रधानमन्त्री केपी शर्मा ओलीसँग बिबिसी टेलिभिजनले अन्तर्वार्ता लिएको थियो ।

प्रकाशित मिति : १२ कार्तिक २०७६, मंगलवार ०४:५३
प्रतिक्रिया दिनुहोस्