Logo

स्वास्थ्य शिविरमा सात हजारले लिए सेवा



८ कात्तिक, गलकोट । बागलुङ बजारमा अयोजना गरिएको दुईदिने बृहत् स्वास्थ्य शिविरमा सात हजार ९८३ बिरामीले सेवा लिएका छन् । ताइवान र नेपालका करीब ३०० स्वास्थ्यकर्मीको सहभागितामा धवलागिरि अञ्चल अस्पतालमा बुधबार र बिहीबार दुईदिने निःशुल्क स्वास्थ्य शिविरको आयोजना गरिएको थियो ।

शिविरको पहिलोदिन बुधबार तीन हजार ८९३ र बिहीबार तीन हजार ९० ले उपचार, परामर्श तथा आषौधि सेवा लिएका अस्पताल व्यवस्थापन समितिका अध्यक्ष केबी रानामगरले जानकारी दिनुभयो । लामो समयदेखि नशारोगसँग लडिरहनुभएका बागलुङ नगरपालिका–४ का गौरी विकले निःशुल्क उपचार पाउँदा निकै खुशी व्यक्त गर्नुभयो ।

शिविरमा नाक, कान, घाँटी, पेट, आँखा, स्त्रीरोग, पारिवारिक औषधि, चिनियाँ (ताइवान) औषधि, बाल चिकित्सा, दन्त, हृदयरोग नशा, हाडजोर्नी, फोक्सोसम्बन्धी सेवा उपलब्ध गराइएकोे शिविरको आयोजक रोटरी क्लब अफ बागलुङका सचिव दीपेन्द्र घिमिरेले जानकारी दिनुभयो ।

शिविरमा ताइवानबाट ३० चिकित्सकसहित १२० जनाको मेडिकल टिम, गण्डकी अस्पताल पोखरा, हिमालय आँखा अस्पताल पोखरा र धवलागिरि अञ्चल अस्पतालका करीब ५० चिकित्सकसहित १५० रोटरियन मेडिकल टिम, स्वयंसेवी, पोखरा हेल्थ साइन्स एकेडमी, पश्चिम नेपाल स्वास्थ्य एकेडेमीका स्वास्थ्यकर्मीले सेवा प्रदान गरेका थिए ।

रोटरी इन्टरनेशल डिस्ट्रिक ३५२३ ताइवान (चीन) तथा रोटरी इन्टरनेशनल डिस्ट्रिक ३२९२ नेपालको सहयोग तथा रोटरी क्लब अफ बागलुङ, धवलागिरि अस्पताल र रोट्रयक्ट क्लव अफ बागलुङको संयुक्त आयोजनामा निःशुल्क बृहत स्वास्थ्य शिविरको आयोजना गरिएको थियो । शिविरमा आएका ताइवानीले अस्पताललाई आवश्यक उपकरण तथा रामरेखा आधारभूत विद्यालयका विद्यार्थीलाई शैक्षिक सामग्रीसमेत हस्तान्तरण गरेका थिए । नेपालमा स्वास्थ्य सेवा लिएर आउँदा निकै खुशी लागेको रोटरी इन्टरनेशनल डिस्ट्रिक ताइवानका गर्भनर जोयले खुशी व्यक्त गर्नुभयो ।

प्रकाशित मिति : ८ कार्तिक २०७६, शुक्रबार १३:५४
प्रतिक्रिया दिनुहोस्