१६ चैत्र २०८०, शुक्रबार | Fri Mar 29 2024

सर्ट फिल्मले जुर्‍यायो शिवशंकर रिजालको ‘जोगिन्दर’ उपनाम


२८ असोज , काठमाडाैं । जोगिन्दरको उपनामले परिचित शिवशंकर रिजालले हिमालय टेलिभिजन कार्यक्रम गर्न थालेको लामो समय भइसकेको छ । ‘जोगिन्दर बोले प्रणामजी’को पहिलो एपिसोडमै तत्कालीन ऊर्जा मन्त्री डा. प्रकाशशरण महतलाई अतिथि बनाएर मैनबत्ती बालेर कार्यक्रम गरेपछि उनी प्रस्तोताको रूपमा स्थापित नै भए ।

त्यसयता उनले जोगिन्दरको क्यारेक्टरमा रहेर कार्यक्रम गर्दै आएका छन् । पान पसलेको रूपमा प्रस्तुत हुने उनले आफ्नो क्यारेक्टरलाई मधेशको प्रतिनिधिको रुपमा अगाडि ल्याएका छन् । जोगिन्दरको उपनामले चर्चामा आएका शिवशंकरलाई त्यो नाम र क्यारेक्टर एक सर्ट फिल्मले दिएको हो ।

‘मलाई लिएर आशिफ शाहले एउटा सर्ट फिल्म बनाउनु भएको थियो । जहाँ म पान पसलेको रूपमा प्रस्तुत थिए । त्यहीँबाट मैले यो क्यारेक्टरलाई बोकेको हुँ’, जोगिन्दरले भने ।

अमेरिकी दूतावासको एक प्रतियोगिताको लागि बनाइएको उक्त सर्ट फिल्म विजेता बनेसँगै जोगिन्दर क्यारेक्टरको चर्चा भयो । त्यसैले गर्दा उनले जोगिन्दरलाई अगाडि बढाउने सोच बनाए ।

‘मैले क्यारेक्टरलाई कसरी जीवित राख्ने सोच्दै थिएँ र त्यही समयमा हिमालयन टिभी सुरु भयो । मैले नारायण पुरी दाइसँग सल्लाह गरेर कार्यक्रम सुरु गरे र अहिलेसम्म निरन्तर सञ्चालन गरिरहेको छु’, उनले भने ।

उनलाई सर्वसाधारणले पान पसलेसम्म भन्ने गरेका छन् । यस्तो सुन्दा उनी क्यारेक्टरले पाएको मायाले खुसी हुन्छन् । ‘आफूले मेहनत गरेको क्यारेक्टरलाई दर्शकले रिलेट गर्दा खुसी लाग्छ’ जोगिन्दरले भने । प्रायः मेला महोत्सवमा उनले आफूलाई त्यही क्यारेक्टरमा प्रस्तुत गर्ने गरेका छन् ।

त्यसो त बेलाबखतमा मधेसी क्यारेक्टरको विवाद पनि निम्तिने गरेका छन् । यद्यपि, उनी आफूले निर्वाह गरेको भूमिका प्रति विश्वस्त छन् । ‘हाम्रो कार्यक्रमले मधेश र मधेसीको संस्कृतिलाई अगाडि ल्याउने कार्य गरेको छ । हामीले क्यारेक्टरमार्फत समुदायलाई असर पर्ने काम गरेका छैनौ’, जोगिन्दरले भने ।

उनले मधेसको संस्कृितलाई विदेशमा समेत पु¥याएको बताए । ‘हाम्रो संस्कृतिलाई अगाडि बढाउन सक्दो प्रयत्न गर्नु पर्छ’ उनले भने । जोगिन्दरको शो पछिल्लो समय सञ्चालनमा छैन । तर, क्यारेक्टरलाई उनले प्रहसनमार्फत जीवन्त बनाइरहेका छन् ।

प्रकाशित मिति : २७ आश्विन २०७८, बुधबार १२:४३