दैनिकी

  • २१ बैशाख २०७८, मंगलवार १७:५७

विदेशीलाई नेपाली नागरिकता दिलाउन सिफारिस गर्ने वडाध्यक्ष पक्राउ परे लगत्तै छुटे

२१ वैशाख, झापा । विदेशीलाई नेपाली नागरिकता दिलाउन सिफारिस गरेको आरोप लागेपछि फरार रहेका विर्तामोड नगरपालिका–८ का वडाध्यक्ष अजय कार्की सोमबार पक्राउ परेकै दिन धरौटीमा छुटेका छन् । दुई वर्षअघि गैह्रनेपालीलाई नागरिकता दिलाउन अनुसूची फाराममा हस्ताक्षरसहित सिफारिस गरेको आरोपमा वडाध्यक्ष कार्कीविरुद्ध मुद्दा दर्ता भएको थियो ।

अदालतबाट पक्राउ पूर्जी जारी भएपछि लामो अवधिदेखि फरार रहेका कार्कीलाई सोमबार चन्द्रगढीबाट पक्राउ गरिएको झापा जिल्ला प्रहरी कार्यालयका सूचना अधिकारी राकेश थापाले जानकारी दिनुभयो ।

प्रहरीले आरोपी कार्कीलाई पक्राउ परेलगत्तै झापा जिल्ला अदालतमा बुझाएको थियो । अदालतले सोमबार रु नौ लाख धरौटी मागेको थियो । कार्की धरौटीबापतको रकम बुझाएर सोमबार नै तारेखमा छुटेका छन् ।

 

 

 

 

 

प्रकाशित मिति: २१ बैशाख २०७८, मंगलवार १७:५७